̽������

Gyda nifer gynyddol o fyfyrwyr rhyngwladol, ymatebodd Ysgol Busnes Bangor i'r heriau o reoli carfannau mawr ac amrywiol drwy ymgorffori cydraddoldeb, amrywiaeth a chynhwysiant yn rhan o’n hymarfer addysgu craidd. Mae modiwlau megis Rheolaeth Strategol Rhyngwladol a Cymhwysedd Proffesiynol bellach yn integreiddio sesiynau ar ddealltwriaeth ddiwylliannol, proffesiynoldeb ac ymddygiad cynhwysol. Mae darlithoedd sy’n rhoi sylw penodol i gydraddoldeb, amrywiaeth a chynhwysiant wedi'u hymgorffori ar draws y cwricwlwm, gan helpu myfyrwyr i ddeall cynnwys academaidd a'r gwerthoedd cynhwysol sy'n sail i lwyddiant proffesiynol.

Mae Clinig Busnes Ysgol Busnes Bangor yn cefnogi ystod eang o fusnesau lleol, gan gynnwys busnesau sy'n cael eu harwain gan fenywod ac unigolion o gefndiroedd lleiafrifol. Mae'r Clinig wedi hwyluso nifer o siaradwyr gwadd mewn nifer o fodiwlau, gan gynnwys arweinwyr benywaidd proffil uchel fel cyn-Brif Swyddog Adnoddau Dynol Harrods ac uwch swyddogion gweithredol o'r GIG a'r sectorau plismona.

Mae ein staff academaidd a phroffesiynol yn mynd ati’n weithredol i rannu eu teithiau personol drwy weithdai a thrwy fentora myfyrwyr. Er enghraifft, yn ddiweddar, rhannodd darlithydd ei brofiad o fod yn fyfyriwr rhyngwladol anabl, gan ysbrydoli myfyrwyr gyda neges o wytnwch a chefnogaeth. Rydym hefyd yn tynnu sylw at lwyddiannau myfyrwyr fel Kristen, myfyrwraig BSc Bancio a Chyllid a gafodd le yn interniaeth fawreddog 'Young Women into Finance' a gynhigir gan y Société Générale. Roedd hi yn un o ddim ond pump i gael eu dewis o blith dros 10,000 o ymgeiswyr.

Mae ein seminarau ymchwil yn rheolaidd yn cynnwys ysgolheigion o gefndiroedd sydd heb gynrychiolaeth ddigonol, gan gynnig nid yn unig ysbrydoliaeth academaidd ond cynrychiolaeth hanfodol hefyd. Mae'r siaradwyr hyn yn modelu sut y gellir creu llwyddiant academaidd er gwaethaf anghydraddoldebau strwythurol ym maes Addysg Uwch a chymdeithas yn ehangach. Yn fewnol, mae cydweithwyr fel Yener Altunbas yn cynhyrchu ymchwil sy’n cael effaith fawr ym maes rhywedd a newid hinsawdd. Mae ei ymchwil wedi cyrraedd cynulleidfaoedd ym maes polisi a chynulleidfaoedd ar y cyfryngau, tra bod cydweithwyr eraill yn cyfrannu ymchwil i fenywod mewn chwaraeon, cyflogadwyedd ymhlith grwpiau ecwiti, ac ymarfer ymchwil cynhwysol:

Mae nifer o gyhoeddiadau academaidd, sy’n fawr eu heffaith, gan ymchwilwyr o Ysgol Busnes Bangor yn ategu ymhellach yr ymrwymiad sydd gennym at amrywiaeth a chynhwysiant:

Mae Dr Charlotte Smith yn arwain ar geisiadau PhD i’r Cyngor Ymchwil Economaidd a Chymdeithasol (ESRC), gan gefnogi mynediad teg at gyllid a llwybrau doethurol. Hefyd, mae cydweithwyr eraill wedi cyhoeddi canllawiau i ymchwilwyr ar ddechrau eu gyrfa er mwyn hyrwyddo cynhwysiant teg o ran awduraeth academaidd a datblygu syniadau. Er enghraifft, mae rhai cydweithwyr wedi bod yn cyfrannu at Ysgoloriaeth Cynhwysiant Athena Swan Bangor trwy fod yn aelodau o’r panel cyfweld, er mwyn annog myfyrwyr o gefndiroedd difreintiedig i wneud gradd meistr ym Mangor. 

Mae mentora yn elfen allweddol o ddatblygu staff yn Ysgol Busnes Bangor. Mae Dr Fariba Darabi yn chwarae rhan arwyddocaol yn y gwaith o gynefino a chefnogi academyddion ar ddechrau eu gyrfa. Mae Dr Felix Shi yn cyfrannu at gydraddoldeb, amrywiaeth a chynhwysiant ar lefel yr ysgol ac yn genedlaethol, gan gynnwys ar fyrddau ymgynghorol allanol. Cafodd ei gyfraniadau at arweinyddiaeth ym maes cydraddoldeb, amrywiaeth a chynhwysiant eu canmol gan y Sefydliad Rheolaeth Siartredig (CMI) mewn archwiliad diweddar.

Fel rhan o'n hymrwymiad parhaus i gefnogi dilyniant gyrfa ac i ddatblygu arweinyddiaeth menywod mewn addysg uwch, mae'r ysgol yn annog staff i gymryd rhan yn Rhaglen Arweinyddiaeth Aurora sy’n cael ei gynnal gan Advance HE. Mae sawl aelod o staff academaidd a staff yn y gwasanaethau proffesiynol naill ai wedi cwblhau neu wedi eu cofrestru ar y rhaglen ar hyn o bryd. Mae’r rhaglen wedi'i chynllunio i alluogi menywod i feddwl amdanyn nhw eu hunain fel arweinwyr ac i ddatblygu'r hyder a'r sgiliau sydd eu hangen i symud ymlaen yn eu gyrfaoedd. Mae cymryd rhan yn rhaglen Aurora wedi golygu bod arweinwyr benywaidd yn fwy gweledol o fewn yr Ysgol, ac mae sawl cydweithiwr wedi mynd yn eu blaenau i ymgymryd â rolau allweddol megis bod yn gyfarwyddwyr rhaglenni, yn gadeiryddion pwyllgorau, ac yn gydlynwyr mentora. Rydym yn parhau i hyrwyddo'r cynllun drwy gyfathrebu mewnol, trafodaethau un-i-un ynghylch datblygiad, a phrosesau adolygu perfformiad, gan sicrhau bod yr holl staff cymwys yn ymwybodol o'r cyfle ac yn cael eu cefnogi i wneud cais.

Mae'r podlediad “Penny for Your Thoughts”, sy’n cael ei gynhyrchu gan Ysgol Busnes Bangor, yn darparu llwyfan ar gyfer deialog gynhwysol. Mae penodau diweddar wedi rhoi sylw i Black Lives Matter, i anghydraddoldebau rhywedd yn y system fudd-daliadau, ac mae cyfweliadau gydag entrepreneuriaid ac arweinwyr benywaidd. Mae data am ymgysylltiad gwrandawyr yn ein helpu i fesur effaith a chyrhaeddiad, gan amlygu gwerth y fenter hon o ran gwreiddio trafodaeth gynhwysol o fewn y parth cyhoeddus.

Rydym yn ymfalchïo yn ein hymrwymiad i gynhwysiant o ran y Gymraeg. Mae staff yn cyfrannu sylwebaeth ddwyieithog ar faterion cymdeithasol ac economaidd allweddol, gan wneud ymchwil a deialog gyhoeddus yn fwy hygyrch. Caiff cyfathrebu ac addysgu cyfrwng Cymraeg eu cefnogi’n weithredol ar draws yr Ysgol.

Mae aelodau staff yn cymryd rhan weithredol mewn rhwydweithiau cynhwysiant ledled y brifysgol. Mae un cydweithiwr yn aelod o rwydwaith staff LHDTC+, gan gyfrannu’n fisol at adolygiadau polisi a mecanweithiau adborth. Mae cydweithiwr arall wedi ymuno â'r rhwydwaith niwroamrywiaeth a lansiwyd yn ddiweddar, sy’n sicrhau cydnabyddiaeth gynyddol o’r anghenion amrywiol sydd i’w cael o fewn ein cymuned academaidd.

Mae'r fenter fewnol hon, dan arweiniad Hanxiong Zhang, Siwan Mitchelmore, Elizabeth Heyworth-Thomas, a Heather He, yn hyrwyddo addysg fenter gynaliadwy ac entrepreneuriaeth gymdeithasol gyfrifol, a gall staff a myfyrwyr elwa arni.

Mae Dr Felix Shi, sef Arweinydd Cydraddoldeb, Amrywiaeth a Chynhwysiant Ysgol Busnes Bangor, wedi cyfrannu at fenter   yn Ysgolion Busnes Cymru sy’n cael ei chynnal gan Brifysgol Abertawe. Mae'r gwaith cydweithredol hwn wedi bod o gymorth i rannu arferion gorau ar draws sefydliadau ac wedi dylanwadu'n uniongyrchol ar ddatblygiadau parhaus ym maes cydraddoldeb, amrywiaeth a chynhwysiant o fewn yr ysgol. Bu'r Arweinydd Cydraddoldeb, Amrywiaeth a Chynhwysiant yn rhan o’r gwaith o gyd-greu a gwerthuso deunyddiau cwricwlwm cynhwysol, canllawiau polisi, a phecynnau cymorth ymarferol a gynlluniwyd i ymgorffori egwyddorion cydraddoldeb, amrywiaeth a chynhwysiant ar draws arferion addysgu, dysgu a datblygu staff. Drwy gymryd rhan mewn cymuned ymarfer, fe wnaethant gyfrannu mewnwelediadau o gyd-destun Prifysgol Bangor tra’n dysgu am ddulliau arloesol a fabwysiadwyd ym Mhrifysgol Abertawe, gan gynnwys fframweithiau sy'n cefnogi cynhwysiant croestoriadol ac arweinyddiaeth academaidd deg. Mae'r cydweithio traws-sefydliadol hwn wedi cael effaith gadarnhaol a mesuradwy ar Ysgol Busnes Bangor. Mae wedi llywio’r gwaith o fireinio ein hymagwedd tuag at gwricwlwm cynhwysol, wedi cynorthwyo yn y gwaith o ailgynllunio ein deunyddiau cynefino a hyfforddi yn nghyd-destun cydraddoldeb, amrywiaeth a chynhwysiant, ac wedi annog rhagor o staff i fabwysiadu addysgeg gynhwysol ar draws ein timau addysgu. Mae hefyd yn enghraifft o sut mae arweinyddiaeth ein swyddogaeth cydraddoldeb, amrywiaeth a chynhwysiant yn troi eu golygon at allan ac yn dangos ymrwymiad Ysgol Busnes Bangor i gyfrannu at newid ledled y sector.

Yn 2022, rhoddodd yr ysgol gefnogaeth i fyfyriwr PhD trwy’r rhaglen CARA, sef ‘Council for At-Risk Academics’. Nod y fenter hon yw diogelu academyddion y mae eu bywydau a'u gwaith mewn perygl oherwydd aflonyddwch gwleidyddol, gwrthdaro neu orthrwm. Cefnogodd y grant penodol hwn ysgolhaig benywaidd, gan gyd-fynd â gwerthoedd craidd Athena Swan o ran amddiffyn, cynhwysiant a datblygiad menywod yn y byd academaidd. Cafodd cefnogaeth ariannol a mentora academaidd eu darparu gan yr Ysgol, gan alluogi'r fyfyrwraig i barhau â'i hymchwil mewn amgylchedd diogel a chefnogol. Mae hyn yn dangos ein hymrwymiad ehangach i degwch, i solidariaeth academaidd byd-eang, ac i hyrwyddo lleisiau nad oes ganddynt gynrychiolaeth ddigonol mewn cymunedau ymchwil.

Mae ein rhaglen allgymorth yn chwarae rhan strategol yn y gwaith o gefnogi ein hymrwymiadau mewn perthynas ag Athena Swan, yn enwedig o ran mynd i'r afael ag anghydbwysedd rhwng y rhywiau a hyrwyddo cyfle cyfartal. Mae’r allgymorth wedi'i gynllunio'n fwriadol i feithrin ymgysylltiad cynaliadwy ac ystyrlon ag ysgolion a cholegau lleol, gan dargedu’n arbennig fyfyrwyr o gefndiroedd difreintiedig neu sydd heb gynrychiolaeth ddigonol, gan gynnwys merched, cymunedau Cymraeg eu hiaith, a myfyrwyr sy’n dilyn llwybrau galwedigaethol. Mae ymdrechion yr ysgol yn canolbwyntio ar ehangu cyfranogiad mewn pynciau sy'n gysylltiedig â busnes drwy herio stereoteipiau a chreu profiadau dysgu cynhwysol ac ysbrydoledig sy'n dangos pwy all lwyddo mewn disgyblaethau megis Busnes, Cyfrifeg ac Economeg. Mae mentrau diweddar wedi gwneud cyfraniadau sylweddol tuag at y nodau hyn. Croesawyd dros 120 o fyfyrwyr o flynyddoedd 11 i 13 i lansiad Cynhadledd Economeg Gogledd Cymru yn 2024, a gyflwynwyd mewn partneriaeth â Llywodraeth Cymru a Discover Economics. Gyda ffocws cryf ar gynhwysiant o ran rhywedd a sefyllfa economaidd-gymdeithasol, trwy’r prif anerchiadau, sesiynau rhyngweithiol, ac efelychiadau polisi cynigiodd y digwyddiad fewnwelediadau perthnasol i economeg, gyda'r nod o wneud y pwnc yn fwy hygyrch ac apelgar, yn enwedig i ferched. Yn yr un modd, mae gweithdai allgymorth trwy brofiad megis yr Her Buddsoddi, yr Her Farchnata, a'r Her Arweinyddiaeth Uchelgeisiol wedi cael eu cyflwyno i ddisgyblion chweched dosbarth ar draws y rhanbarth. Nid yn unig y mae’r sesiynau ymarferol hyn yn rhoi sgiliau ymarferol, trosglwyddadwy i fyfyrwyr, ond maent hefyd yn codi dyheadau a hyder ymhlith y rhai sy'n llai tebygol o ystyried addysg uwch fel dilyniant naturiol.

Mae'r ysgol hefyd wedi cyflwyno darlithoedd gwadd a sesiynau blasu pynciol mewn economeg ymddygiadol, llythrennedd ariannol, a moeseg cyfrifeg, sydd wedi'u teilwra'n benodol ar gyfer cynulleidfaoedd lleol ac wedi'u cynllunio i wneud cyswllt rhwng syniadau academaidd â pherthnasedd yn y byd go iawn. Mae'r sesiynau hyn wedi eu llunio gan gadw mewn cof y rhwystrau y mae rhai myfyrwyr, yn enwedig merched a myfyrwyr o gefndiroedd economaidd-gymdeithasol is, yn eu hwynebu wrth weld eu hunain mewn rolau academaidd neu mewn rolau proffesiynol ym myd busnes. Yn ychwanegol at hyn, rydym wedi gwneud ymdrech benodol i hyrwyddo llwybrau amgen i feysydd Cyfrifeg a Chyllid, gan amlygu llwybrau pontio clir ar gyfer dysgwyr galwedigaethol, megis dysgwyr a chanddynt gymwysterau AAT. O wneud y llwybrau hyn yn llai dirgel, mae'r Ysgol wedi ymestyn y cyfleoedd i fyfyrwyr o gefndiroedd anhraddodiadol.

Yn olaf, fel cynllun peilot, cyflwynwyd Clwb Codio a Dadansoddeg i gefnogi llythrennedd digidol cynnar, gyda ffocws ar ymgysylltu â grwpiau sydd heb gynrychiolaeth ddigonol, yn enwedig merched. Drwy ddefnyddio offer megis Python a dulliau dadansoddeg gweledol, mae'r fenter hon yn helpu i feithrin hyder digidol ac annog diddordeb mewn meysydd sy'n tyfu'n gyflym megis technoleg ariannol a dadansoddeg data busnes. Gyda'i gilydd, mae'r rhaglenni hyn yn dangos ymrwymiad parhaus Ysgol Busnes Bangor i gydraddoldeb a chynhwysiant — gan drosi egwyddorion Athena Swan yn gamau gweithredu gweladwy ac ymarferol sy'n cael effaith gadarnhaol ar y gymuned ehangach.