̽������

Mae dwy gangen o radiograffeg: Diagnostig a Therapiwtig. Mae radiograffwyr yn gweithio gyda gweithwyr meddygol proffesiynol megis ymarferwyr cynorthwyol, radiolegwyr ac oncolegwyr i roi cefnogaeth a gofal i gleifion sy'n canolbwyntio ar yr unigolyn yn ystod prosesau sgrinio, diagnosis, trin a monitro trawma a chlefyd.

Bydd radiograffwyr diagnostig yn defnyddio ystod o dechnoleg ddelweddu i ymchwilio i ba gyflwr neu afiechyd a allai fod yn achosi salwch claf. Mae'r rhain yn cynnwys:

• Pelydr-X i archwilio esgyrn a cheudodau'r corff
• Fflworosgopeg i weld delweddau amser real o'r system dreulio
• Gall delweddu cyseiniant magnetig edrych ar wahanol fathau o feinwe yn y corff dynol ac adeiladu delwedd 2D neu 3D
• Gellir defnyddio uwchsain i edrych ar feinweoedd meddal a phibellau gwaed
• Mae Tomograffeg Gyfrifiadurol yn cynnig golwg trawstoriadol o'r corff

Mae radiograffwyr therapiwtig yn defnyddio dosau o belydrau-x ac ymbelydredd ïoneiddio pellach i drin cyflyrau meddygol - canser a thiwmorau yn bennaf.

Mae radiograffwyr yn Weithwyr Proffesiynau Perthynol i Iechyd  sydd yn y Deyrnas Unedig yn gweithio o dan reoleiddiad y Gymdeithas Proffesiynau Iechyd a Gofal (HCPC). Mae radiograffwyr yn cynnig sylwadau ar ddelweddau i'r sawl sy'n cyfeirio ar ôl cwblhau archwiliad; gallant hefyd lunio adroddiadau llawn ar ôl cael hyfforddiant ôl-radd arbenigol.

Wrth astudio radiograffeg ar lefel ôl-raddedig, gall radiograffydd ddatblygu ei rôl i gynnwys adrodd ar ddelweddau, addysgu myfyrwyr sy'n astudio radiograffeg, hyfforddi radiograffwyr ôl-raddedig neu roi triniaethau fflworosgopig, angiograffig ac endosgopig.

Mae radiograffwyr yn gweithio mewn sawl adran ysbyty yn ogystal â'r adran ddelweddu; gan gynnwys adrannau damweiniau ac achosion brys, theatrau llawdriniaeth ac mewn wardiau ysbytai. 

Yn ôl Cymdeithas y Radiograffwyr, “Mae'r proffesiwn yn ddeinamig, yn datblygu'n gyflym mewn ymateb i anghenion sy'n newid ym meysydd technoleg, iechyd a phoblogaeth cleifion. Bob blwyddyn, bydd radiograffwyr yn darparu gwasanaethau gofal iechyd hanfodol (24 awr y dydd, 7 diwrnod yr wythnos) i filiynau o bobl.”

Mae Bangor yn derbyn ceisiadau am Radiograffeg Diagnostig trwy gydol y flwyddyn, tra bod lleoedd ar gael. Fodd bynnag, anogir ceisiadau cynnar gan fod radiograffeg fel arfer yn llenwi ei holl leoedd ymhell cyn diwedd y cylch derbyn bob blwyddyn.